O grupo inicial, configurado a partir da coordinación de Adrián Vázquez, foi consolidando e ampliando a análise primixenia: era necesario cubrir un oco dentro do panorama do podcasting galego que aproveitara a conexión entre xornalismo alternativo e politoloxía para achegar coñecemento. Non  para competir entre dous perfís e eidos profesionais, senón traballar xuntos.

Así, o equipo de xornalistas, composto por Román Varela, Adrián Vázquez, Pablo J. Rañales e Carmen del Río Ferreiro mesturouse cos politólogos da actual autocaravana Yannick Juncal e Julio Iglesias, tamén estudantes na USC. Unha unión que permitiu chegar ata aquí.

Carretando medra. Pasa de ser un podcast que abrumou e ilusionou pola súa acollida a unha plataforma colaborativa. Medra a idea, medra o espazo e medra tamén o equipo, coa incorporación da xornalista Lorena Iglesias coma creadora de contidos e social media manager das nosas redes sociais. Mantense, iso si, unha visión da política dende a complicidade, dende a construción e a reflexión por enriba da destrución e a competición. 

Un proxecto que loita, ademais, contra as circunstancias xeracionais que nos rodean: o abismo dun mercado laboral case sempre en solitario e unha esfera mediática que precisa dun xornalismo máis conectado que nunca coa interpretación, a veracidade, a lentitude e a análise. Un xornalismo comprometido coa subxectividade e a honestidade, sexa coa narrativa que sexa, no formato que sexa.